СЕРБИЯ – У Сербиї того року випродуковане за 20 одсто вецей жита як влонї, односно коло 2,88 милиони тони, виявел того тижня шеф Одсеку за рошлїнску продукцию Министерства польопривреди Милан Чуплич.
Як гварел, под житом було 295 000 гектари, цо вецейрочни просек, алє штреднї урожай жита бул коло 4,8 тони по гектаре. Продукция жита подполно достаточна за домашнї потреби, а за вивоз будзе коло 1,5 милиони тони жита.
Чуплич винєсол и оцену же того року у швеце випродуковани коло 738 милиони тони жита и же то рекордна продукция за остатнї седем роки.
– Наш род од коло 2,88 милиони тони виноши 0,4 одсто у шветовей продукциї. Ми нє можеме диктовац цену, жито берзанска роба и одредзує ше ю на основи понукнуца и поглєдованя – гварел Чуплич, наглашуюци же ше у Сербиї одражує цена у Чарноморским реґионє.
Кед бешедовал о тогорочним житу, цена му була од 14 до 15,5 дин. за кґ и, як гварел, оценєте же цена продукциї хлєбового жита коло 10 динари за килограм.
На другим боку, у Задружним союзу Войводини визначели же одкупна цена од 14 дин. за кґ нєприлапююца и по їх рахунку би мала буц найменєй 20 динари за килограм.