РУСКИ КЕРЕСТУР – Приявйованє рецитаторох за участвованє на Стретнуцу рецитаторох „Михайло Зазуляк” тирва по ютре, 5. новембер, а тогорочна 26. Културна манифестация „Костельникова єшень” будзе отримана од 15. по 23. новембер у вецей наших местох.
Стретнуце рецитаторох „Михайло Зазуляк” того року будзе отримане на соботу, 16. новембра на 15 годзин, як и дотераз у Кули (у ОШ „Петефи бриґада”), у нєпоштредней орґанизациї Руского КУД „Др Гавриїл Костельник”.
Учашнїки буду подзелєни до трох катеґорийох, як цо то и на урядових смотрох рецитованя на уровню АП Войводини.
Дом култури Руски Керестур поволує нашо КУД и школи же би найпознєйше по 5. новембер приявели своїх рецитаторох за участвованє на тим стретнуцу. Орґанизатор обезпечи надополнєнє трошкох превозу за єден авто каждей орґанизациї у предвидзеней вредносци, як и закуску и ошвиженє.
Рецитаторох треба приявиц на имейл адресу dk.kerestur@gmail.com, лєбо на тел/факс; (025) 703-032, 703-357. Контакт особа Михайло Бодянец.