НОВИ САД – Пре розвиванє руралного туризму и валалскей привреди запровадзена ознака „Реґионални бренд Бачкей”, хтора трошительом ґарантує же купую квалитетни продукти. Ґу тому, продуковательох мотивує за дальшу роботу, а тот бренд лєгчейше достац як ознаку ґеоґрафского походзеня.
„Реґионални бренд Бачкей”, по углядзе на Польску, Ческу и Словацку, порушала Реґионална розвойна аґенция Бачка (РРА), з потримовку Министерства тарґовини и туризму.
– Маме коло 33-ох добитнїкох, а тото число рошнє. Шицки задоволєли споцифични критериюми и можеме повесц же їх продукти, услуги и креативносц позитивно дїйствую на розвой валалских подручох – гварела координаторка проєкту „Реґионални бренд Бачкей” Ивана Паїч.
Директор РРА Бачка Неманя Старович здогаднул же того року почина реализация ИПАРД фондох з Европскей униї хтори наменєни праве руралному розвою, а єст и потенциялу за витворйованє прейґгранїчного сотруднїцтва Сербиї и Горватскей.
Того року ше отвера и прейґгранїчне сотруднїцтво Мадярскей и Сербиї, та нашо польопривреднїки и людзе з валалу годни конкуровац за средства, гварел Старович.