СЕРБИЯ – Од нєшка Реґистер медийох будзе водзиц Аґенция за привредни реґистри (АПР), з чим будзе загашени Реґистер явних глашнїкох, сообщела АПР. Дотерашнї податки з Реґистру явних глашнїкох буду преруцени до бази податкох Реґистру медийох, а медиї хтори нє приявели свойо податки, то буду мушиц поробиц за шейсц мешаци.
Реґистер медийох то централизована електронска база податкох о медийох, у хторей треба же би були шицки дньово и периодични новини, новински аґенциї, радия, телевизиї и интернет-портали.
Уводзенє нового реґистру обезпечи явносц податкох и документох о шицких котри маю вецей як пейц одсто учасци у сновательним капиталу медию, о повязаносци тих особох, та и о других медийох у хторих тоти особи маю вецей як пейц одсто учасци у сновательним капиталу.
У Реґистру медийох буду и податки о тим кельо держава, покраїна, лєбо локална самоуправа участвує у финансованю медию, та штреднє предати тираж медийох у календарским року.