СРИМСКА МИТРОВИЦА – У барокней сали Музею Сриму у Сримскей Митровици вчера отримана програма зоз нагоди преслави Националного швета Руснацох у Србиї.
Зоз програму Руснаци у тим сримским месце жадали указац часц своїх активносцох у року хтори прешол.
На початку програми присутни мали нагоду дознац о Моноґрафиї грекокатолїцкей парохиї у Сримскей Митровици хтору пририхтал паноцец Владислав Варґа, котри ю и представел.
Шпивацка ґрупа „Руски зарї“, як и каждого року, одшпивала старши и новши писнї зоз свойого репертоару у провадзеню оркестра „Ходоба и приятелє“. Шпивачох и оркестер пририхтала музични педаґоґ Даниєла Горняк.
Рецитаторе пречитали даскельо писнї Гавриїла Костельника и преклад руских писньох на сербски – „А ти, мила, а ти, мила, цо думала” и „Ей, млїнару”.
Од наймладших – Мирослави, Снежани, Сари, Теодори и Мариї Страценскових могло чуц рецитациї о св. Миколайови.
Програму водзели, а тиж и рецитовали, брат и шестра Милена и Владимир Костич.
Госци на програми були школяре–ґлумци зоз митровецкей Ґимназиї Миряна Крнич и Оґнєн Вуясинович.
Програму пририхтали члени Подручней канцелариї НС у Сримскей Митровици зоз потримовку Историйного архиву Сриму и директора Деяна Уметича.
