РУСКИ КЕРЕСТУР – З представу „Вона нєвиновата” Йовґена Кочиша, у режиї Михайла Зазуляка, Руски народни театер (РНТ) „Петро Ризнич Дядя” од 22. по 24. септембер госцовал у Словацкей. Представа штварток одбавена у Кладзанох, пияток у Прешове, а всоботу у Земплинскей Теплици, дакедишнїм Керестуре.
Ансамбл РНТ вшадзи бул щиро дочекани и гоч слово о драми з елементами траґедиї о дакедишнїм живоце Руснацох на тих просторох, публика у шицких трох местох барз добре, емотивно и з похвалами ансамблу прилапела представу, визначуюци єй актуалносц и поруки и за нєшкайши час, а тому допринєсол и факт же, пре исту бешеду, нє було язичней бариєри.
Окреме добри наступ РНТ мал на сцени Театру Александра Духновича у Прешове пред доберану театралну публику, а у шицких трох местох ґлумци у представи „Вона нєвиновата” позберал аплаузи и на оствореней сцени, а на концу им публика повинчовала з длугима аплаузами и на стояцо.
Члени ансамблу ше у шицких трох местох стретли и зоз своїма приятелями, бешедоване и о дальшим сотруднїцтве, а у дакедишнїм Керестуре нащивели и Основну школу, грекокатолїцку и римокатолїцку церкву и музейну збирку.
У Кладзанох домашнї РНТ „Петро Ризнич Дядя” бул староста Даниєл Лоринц, у Земплинскей Теплици старостка места Йозефина Угальова, а у Прешове ґлумци ТАД, на чолє з директором Маряном Марком, з котрима дотерашня директорка РНТ, а терашня о.д. директора Заводу за културу войводянских Руснацох Ивана Дудаш вичерала дарунки.
Наш национални театер зоз свою представу („Юшка з канаринца”, тиж у режиї М. Зазуляка) остатнї раз у Словацкей, у ТАД госцовал пред шейсц роками, а терашнї одход витворени дзекуюци наменским средством за РНТ з Националного совиту Руснацох, як и Спорозуменю о медзиреґионалним сотруднїцтве АП Войводини и Прешовского самоуправного краю.