БЕОҐРАД – По вименкох и дополнєньох Закона о роботи з 2014. року, од 1. януара того року утаргнута роботна кнїжочка, а шицки податки хтори ше у нєй находзели тераз мож опатриц у електронскей форми у Централним реґистру у фонду за пензийне и инвалидске осиґуранє (ПИО).
Помоцнїк министра за роботу Зоран Лазич виявел же Централни реґистер обовязного социялного осиґураня функционує як и плановане, а понеже ше преходзи на електронску управу, роботни кнїжочки вецей нє маю улогу.
Роботна кнїжочка як документ у дзепоєдних случайох може буц доказ з предходного периоду, алє нє потребне уношиц нови податки, гварел Лазич и додал же рижни орґани надалєй нє треба же би глєдали роботну кнїжочку, понеже шицки податки можу найсц у централним реґистре фонду ПИО, лєбо у других орґанох и институцийох хтори маю шицки податки у електронскей форми.