БЕОҐРАД – Роботнїки у Сербиї сцу робиц и жиц зоз своєй роботи, мац порядну плацу, безпечносц и здравє на роботи, же би ше им уплацовало доприноси и социялне осиґуранє – поручели члени Союзу самостойних синдикатох Сербиї (СССС) и Зєдинєни фаховни синдикати „Нєзависносц” з нагоди означованя Шветового дня за достоїнствену роботу.
На округлим столє з назву „Стоп гамишносци капиталу”, хтори отримани стреду, 7. октобра, на Шветови дзень за достоїнствену роботу, синдикати оценєли же власнїки капиталу вше гамишнєйши, а роботнїки нє маю шмелосци вимагац витворйованє своїх правох. Професор на Факултету политичних наукох у Беоґрадзе Зоран Стоїлькович винєсол податки же по страху од траценя роботи Сербия медзи першма пейцома жемами.
Робота постала роба, алє у терашнїм чаше и чловек постал роба, та потребне порушац свидомосц роботнїкох же маю права хтори можу хасновац, гварел предсидатель „Нєзависносци” Бранислав Чанак.
Медзинародна орґанизация роботи пред 16 роками 7. октобер одредзела за Шветови дзень за достоїнствену роботу, а нашо два синдикати роботнїкох го означую седми рок.