КУЛА – Роботу ЯП „Завод за вибудов Кула” (Завод), хторе 1. децембра службено будзе загашене, як и його роботнїкох превежнє нове Оддзелєнє за инвестициї, защиту животного штредку и енерґетски менаджмент Општинскей управи, як и штири явно-комунални подприємства у местох општини – одлучене на вчерайшей схадзки Скупштини (СО) Кула, зволаней по наглим поступку.
До гашеня ЯП „Завод за вибудов Кула” приходзи пре ускладзованє з новима законскима предписанями, по хторих локални самоуправи зоз своїх буджетох вецей нє можу финансовац явни подприємства, так же одборнїки СО Кула вчера, 7. новембра, принєсли вименки Одлуки о максималним чишлє занятих на нєдоредзени час у системи локалней самоуправи, як и вименки одлукох о сновательних актох штирох явних подприємствох у местох кулскей општини.
По новей Одлуки число занятих у системи локалней самоуправи звекшане за 33 особи, на вєдно 452, односно за 33-ох занятих у Заводу. Петнацецеро заняти зоз Заводу прейду до Општинскей управи, до кулского „Комуналцу” 10, червинского „Водоводу” 4, а по двох роботнїкох превежнє рускокерестурски „Руском” и сивецки „Роботнїк”. У самей Општинскей управи годни робиц 115 заняти.
Прейґ ЯП „Завод за вибудов Кула” ишли скоро шицки инвестицийни проєкти у местох кулскей општини, та и з месних самодоприносох. „Завод” окончовал и надпатрунок тих роботох, старал ше о комуналней инфраструктури (дзе и явне ошвиценє) и будовательней жеми, пририхтовал проєктованє за обєкти, драги, реґулованє транспорту и транспортну инфраструктуру, отримовал локални драги и дильови, старал ше о защити животного штредку, при „Заводу” робела и Польочуварска служба за шицки хотари, а векшину роботох превежнє будуце спомнуте оддзелєнє Општинскей управи.
О явним ошвиценю у шицких местох општини будзе ше старац кулски „Комуналєц”, а як и други ЯКП, рускокерестурски „Руском” ше убудуце будзе старац и о отримованю дильовох, спортских теренох и теренох за бавенє дзецох, будзе отримовац дражки, бициґлистични дражки, кошиц амброзию, годзен конкуровац за одредзени роботи хтори дотераз були у компетенциї „Заводу”, а роботи годни окончовац 18 заняти.
