ВЕРБАС – Понеже пре нєдостаток пенєжу Основна школа „Братство єдинство“ у Вербаше нє може реновирац и ушориц будинок, родичи школярох уж треци рок з гуманитарнима акциями збераю средства за нєобходни роботи у тей школи.
Од початку рока уложели милион 200 000 динари, а на всоботу отриманим гуманитарним балу, хтори родичи сами орґанизовали, назберали ище 173 000 динари. Окрем з орґанизованьом балу, родичи през рок, у складзе з можлївосцами, сами донирую пенєж, а удало ше им порушац и дружтвено одвичательни подприємства и локалну самоуправу же би уложели до Школи.
З порядних средствох мож виплациц отримованє, а з пенєжу з Покраїнского секретарияту за образованє санировани школски двор. З пенєжу хтори Школа достала од донаторох дотераз реновирани гол и школярски тоалети на поверху Школи, покладзени пантлїкасти зависи, а тераз приоритет ушоренє школярских тоалетох у прижемю.
Членїца Совиту родичох школярох ОШ „Братство єдинство“ Вербас Ясмина Миятович гварела же, гоч є найменша у Вербаше, Школа по резултатох найугляднєйша. Як гварела директорка Славица Шестович, родичи препознаваю добру роботу Школи, та ше число уписаних школярох з рока на рок звекшує.
