КУЛА – Општинска рада (ОР) Кула на вчерайшей схадзки принєсла Ришенє з хторим будзе врацена часц пенєжу за хаснованє услугох Предшколскей установи „Бамби”. Слово о тим же пре погришне обраховйованє економскей цени, место 80 одсто, як то предвидзене зоз законом, родичи за свойо дзеци у ПУ плацели полну цену за услуги. З тим кажди родитель очкодовани за коло 900 динари мешачно.
Як сообщене зоз схадзки ОР, општинска управа припознава гришку, а же би родичи свой пенєж нє глєдали прейґ суду, на цо маю право, бешедоване о двох способох врацаня пенєжу за хтори су очкодовани. Єден саме врацанє пенєжу, а други же би ше тоту суму ураховало до даяких будуцих плаценьох, хтори вец буду зменшани за винос за хтори су очкодовани.
ОР вчера одредзела и конкретни особи котри буду одвичательни за запровадзованє 17 програмох и програмних активносцох за структуру буджету Општини Кула у 2017. року.