Оджак и того року, од 1. по 7. авґуст бул домашнї седмому медзиопштинскому Рукометному кампу за дзивчата и хлапци основношколского возросту на хторим участвовали коло 70 школяре з општинох Оджак, Кула и Бач, а медзи нїма и 22-йо з Руского Керестура.
Циль Кампу виховйовац будуцих рукометашох и рукометашки, же би здобути знаня и схопносци применьовали, далєй розвивали и цо лєпше и квалитетнєйше бавели у клубох у хторих бавя. Дзеци под час Кампу кажди дзень мали два-три тренинґи, мотивацийни роботнї на тему цо значи буц прави спортиста як на змаганьох так и у живоце вообще, а була и обука за нєплївачох.
Руководитель Кампу бул тренер Милорад Лаич, а у тренерскей екипи були ище Ґоран Вєштица, Ненад Чуїч и Керестурци Славко Надь и Злата Паплацко. Медзи визначнима госцами през седем днї Камп нащивели и покраїнски секретар за спорт и младеж Владимир Батез, совитнїк селектора рукометней репрезентациї Сербиї Бранислав Велькович, делеґация Рукометного союзу Горватскей зоз Билого Манастира на чолє з професором Милорадом Шешличом и домашнї предсидатель општини Оджак, Душан Марян.