НОВИ САД – Виґлєдовацки круг и Завод за културу войводянскох Руснацох вчера у Новим Садзе орґанизовали Округли стол з тему „Титова Югославия и руска културна елита”, чий повод 70-рочнїца преглашеня Федеративней Народней Републики Югославиї (ФНРЮ) 29. новембра 1945. року.
На сходзе отриманим у просторийох Заводу, академик Юлиян Тамаш, шеф Одсеку за русинистику проф. др Янко Рамач и публициста Дюра Латяк, през дискусию, хтору модеровал Саша Сабадош. пробовали визначиц найвекши здобутки на културну творчосц и способи културного орґанизованя Руснацох на тих просторох, у периодзе глїбоких дружтвених пременкох.
Окремни акцент положени на пременку улоги Церкви у руским националним и културним живоце, дзе институция марґинализована, алє священство, односно поєдинци, и далєй давали значне доприношенє. Подобна ситуация була и кед слово о улоги предвойнових руских орґанизацийох у вибудови социялистичних институцийох.
Одредзени ступень континуитету мож видзиц у перцепциї подоби и дїла Ґавриїла Костелнїка, чия Ґраматика була учебнїк уж школяром першей генерациї рускей Ґимназиї у Руским Керестуре, як пошведочел єй дакедишнї школяр Дюра Латяк.
Медзитим, шицки учашнїки Округлого столу ше зложели же кед нє „Периклово”, односно златни часи, вец найлєпши за розвой шицких формох култури Руснацох у Югославиї були од конца шейдзешатих по початок дзеведзешатих рокох прешлого вику.
Афирмативна державна политика спрам народносцох, формованє институцийох и стабилне дружтво, алє и мотивована културна елита хтора орєнтована ґу сучасносци, но з правилним вреднованьом здобуткох традициї, заслужни за таку оцену.