ОСИЄК – Внєдзелю, 15. марца, КУД Руснацох Осиєк отримало рочну Скупштину, на хторей звит о роботи поднєсла предсидателька Дружтва Агнетка Балатинац, а прилапени и план роботи за тот рок.
У КУД Руснацох Осиєк прешлого року робели Тамбурови оркестер, Хор и Етно- секция, хтори участвовали на традицийних манифестацийох Руснацох у Горватскей, у Миклошевцох и Петровцох, алє и у Словацкей, у Свиднїку, потим у Босни и Герцеґовини, на других манифестацийох вєдно з КУД-членми Союзу Руснацох Републики Горватскей, та на програмох других националних меншинох.
Дружтво витворело шицки плановани самостойни програми – Подобову колонию, музичну манифестацию „Дравски габи” и Мемориялни турнир у столним тенису „Владимир Тимко”. Орґанизвало и литературне стретнуц з поетесу Любицу Гаргай, як и мали крачунски концерт за членох Дружтва концом рока и вєдно, у 2014. року мало 24 наступи.
За свою роботу КУД Руснацох Осиєк найвецей средствох достава по проєктох на основи конкурсох Совиту за национални меншини РГ, Осиєцко-бараньскей жупаниї и Городу Осиєк, а часц средствох прешлого року утрошена и на комплетованє народного облєчива за наступи секцийох.
Бешедуюци о планє роботи у тим року, на Скупштини заключене же треба винайсц можлївосци и за снованє фолклорней и драмскей секциї.
