НОВИ САД – Редактор порталу Европски заходни Балкан Неманя Тодорович Штиплия концом прешлого тижня оценєл же амандмани на Нарис резолуциї о Звиту о напредованю за 2015. рок, а хтори у вязи з Войводину, поднєсли посланїки ґрупох хтори нє маю достаточну моц у Европским парламенту.
У Европским парламенту у Стразбуру 21. януара усоглашени текст новей резолуциї о Сербиї, о хторим Одбор за вонкашнї дїла будзе гласац 28. януара.
Штиплия за Радио-телевизию Войводини потолковал же ше у инициялним тексту Резолуциї Войводина спомина у контексту єй културолоґийних розличносцох, хтори тиж доприноша идентитету Сербиї.
Звитодавец за Сербию Дейвид Мекалистер у своїм нарису Резолуциї спозорел и же би автономию Войводини нє требало зменшовац, як и же би Закон о финансованю Войводини требало прилапиц без одкладаня, як цо то и предвидзує Устав Сербиї.