ПРЕШОВ (СЛОВАЦКА) – Всоботу 3. децембра, у Прешове отримане 20. зашеданє Округлого столу Русинох Словацкей (ОСРС), на хторим анализовани стан у русинских емисийох у рамикох Народносно-етнїчних емисийох РТВ Словацкей (НЕЕ) на Радио „Патриї“ у Кошицох, як и о проблематики з глєданьом ґазу и нафти по русинских валалох на сиверовостоку Словацкей – информує Рутенпрес портпарол Округлого столу Петро Медведь.
Вязано за першу тему, на Округлим столє присуствовала и руководителька екипи НЕЕ з РТВ Словацкей Кристина Мойжишова и констатоване же за два роки, од кеди вона на чолє того тиму, звекшана минутажа емисйох по русински, злєпшана їх професийносц и уведзени нови програми, а на другим боку, виражене нєзадовольство же пре нєдостаток пенєжу редакция НЕЕ престала з твореньом литературно-драмских програмох. РТВС була єдина институция дзе Русини могли правиц литературно-драмски програми и з тим презентовац свою сучасну литературну творчосц.
Активисти хтори орґанизую петицию „Нє вартайце! Сцеме жиц у здравей жеми“, з хтору ше сце застановиц виглєдованя ґазу и нафти по русинских валалох на сиверовостоку Словацкей з боку єдней компаниї, членох Округлого столу упознали з тоту, уж єден час актуалну проблематику, и достали потримовку и Округлого столу Русинох Словацкей.
Так ше и ОСРС придружел ґу протестом процив потупйованя власнїцких правох жительох вязаних за виглєдовацки вартаня жеми и процив загрожованя животного штредку. На схадзки визначене же ше компания неґативно одноши спрам власнїкох ґрунту и потупює їх права, а державни орґани нє реаґую. ОСРС тиж нє може буц согласни з прецихованьом фактох о можлївих чежких очкодованьох животного штредку, цо може спричинїц висельованє з тих валалох.
Русини надпоминаю же у историї русински валали уж були жертва проєктох хтори спричинєли їх примушуюце напущованє, як цо то було будованє гаци „Старина“, лєбо стварянє Воєней обласци „Яворина“. Як поведзене, ОСРС привита инвестициї хтори у сиверовосточней Словацкей людзом обезпеча роботу, алє нє и таки хтори их отамаль буду виганяц, цо можлїве пре очкодованю животного штредку.
На соботовей схадзки ОСРС овласцел членох Одбору за национални меншини и етнїчни ґрупи Ради Влади Словацкей Републики за людски права, национални меншини и родну ровноправносц Яна Липинского и Милана Пилипа, же би ше з министром култури догварели о ришеню за русинску збирку хтори ше находза у Музею українскей култури у Свиднїку Словацкого народного музею, а хтора там представена як українска збирка.