ЗАД/КАНАДА – У складзе з одлуками Шветового конґресу Русинох/Руснацох/Лемкох же би у каждей держави дзе жию єден датум одредзели за свой дзень, Русини у Сиверней Америки – у Зєдинєних Америцких Державох и Канади – одредзели же то будзе 26. октобер, пише портал лем.фм. На тот дзень 2010. року службено бул преглашени Карпаторусински конзорциюм Сиверней Америки, алє тот датум вязани и за историйни збуваня з 1918. року, за активносц Русинох у Америки хтори ше одноша на политични збуваня у Карпатох, у старим краю.
Теди америцка Руска народна рада, на чолє з Ґриґорийом Жатковичом, познєйшим першим ґубернатором Подкарпатскей Руси у составе Чехословацкей, препоручела Централней рускей народней ради у Прешове же би ше териториї Русинох – Подкарпатскей и Прешовскей Руси – приключело ґу Чехословацкей. Таки предлог потримала и лемковска Руска народна рада, алє предсидатель Томаш Ґарик Масарик з вимогу Русинох з Лемковини, хтора под час Австро-Угорскей була часц Австриї, а нє Угорскей, як Подкарпатє и Прешовщина, нє бул согласни.
За тоти историйни подїї вязани и 26. октобер 1918. року, кед карпатски Русини, вєдно з представителями 20 других державотворних народох, у Нюйорку участвовали у твореню Штредньеевропскей демократскей униї. Русини мали трох представительох у делеґациї, вибраних з найвекших имиґрантских русинских орґанизацийоху ЗАД и Канади и 26. октобра 1918. року представителє 21-ого народу у историйней Сали нєзависносци у Филаделфиї преглашели и подписали Декларацию заєднїцких намирох.
После того була преглашена, та официйно 28. октобра 1918. року настала Чехословацка Република, ґу хторей ше присоєдинєли Прешовска и Подкарпатска Рус.
Як пише лем.фм, попри других збуваньох, Дзень Русинох Сиверней Америки Каропаторусински конзорциюм означел и з пропаґованьом швета на дружтвеней мрежи Фейсбук, а о активносцох Русинох за океаном мож ше поинформовац прейґ www.facebook.com/RusynMemes.