РУСКИ КЕРЕСТУР – После чежких змаганьох кадети ФК „Русин” всоботу, 19. октобра победзели ФК „Маґлич” зоз резултатом 4꞉3 (0꞉2).
У першим полчасу лабда була углавним на процивнїким боку, та ше госцом поспишело за кратки час дац два ґоли Русиновцом. Медзитим, и попри такого резултату, Русиново бавяче нє страцели самодовириє, напроцив, за нїх змаганє теди лєм почало. Други полчас бул вельо динамичнєйши, бо ше Русиновци розбавели, та обрацели резултат на 3꞉2. После такого резултату, процивнїцка екипа розпочала зоз моцнєйшим бависком, но, без огляду на прицисок, Русиново бавяче ше шмело бранєли. Дзешец минути пред конєц змаганя бавяче з Маґличу вировнали резултат на 3꞉3 и теди, кед шицки думали же то останє и конєчни резултат змаганя, у остатнєй минути пред конєц було досудзене шлєбодне бице зоз 25 метерох кед Александар Тома затресол процивнїкову мрежу и звекшал резултат на 4꞉3.
Попри Александра Тому, на змаганю ґоли дали и Неманя Ковачевич, а аж два ґоли посцигнул Давид Надь.
Бавяче Русину хтори наступаю у тей сезони꞉ Давид Чордаш, Александар Драґутинович, Марко Ковачевич, Теодор Няради, Марио Иличич, Попов Марко, Мирко Надь, Алексей Бики, Божидар Чонка, Боян Вилянац, Тадей Бодянец, Матео Чордаш, Никола Максимович, Александар Тома, Лука Иличич, Неманя Ковачевич, Давид Надь, Алексей Джуджар, Микола Папуґа, Желько Виславски, Филип Семан. Тренере Русиновцох꞉ Зденко Шомдї, Владимир Хома и Деян Йолич.
На спомнутим змаганю попри одличних бавячох, окреме ше визначел ґолман Русина Матео Чордаш, понеже ше схопному ґолманови вельо раз поспишело зачувац ґол од моцней процивнїцкей екипи.
Змаганє останє запаметне по напартей, алє фер борби, а нови виволаня чекаю бавячох Русину такой на соботу 26. октобра кед одходза до Апатину одбавиц змаганє процив тиж моцного клубу Младосц. Русиновци з тей нагоди поволую своїх парнякох, приятельох, навиячох або просто любительох фодбалу же би их пришли потримац понеже орґанизовани автобуски превоз.
