Русинскей меншини вецей пенєжи у тим року

автор зам
888 Опатрене

СЛОВАЦКА – На основи державного буджету, Русини у Словацкей за свойо програми и проєкти того року достаню 294 032 еври, цо за коло 30 000 еври вецей як прешлого року – пишу Интернет новини Академиї русинскей култури Словацкей.

У буджету Словацкей Републики за активносци националних меншинох у 2015. року вєдно предвидзени 3 милиони 879 250 еври. Найвецей достаню припаднїки мадярскей меншини – милион 955 296 еври, потим ромскей 664 152 еври, а на трецим месце по суми средствох Русини.

За програму „Интеретнїчни и интеркултурни диялоґ” у буджету Словацкей опредзелєни прейґ 232 000 еври, за програми українскей меншини 100 673 еври, нємецкей нє цали 89 000, польскей прейґ 64 000, русийскей прейґ 53 000, єврейскей нє цали 53 000 еври, горватскей прейґ 48, болгарскей прейґ 35, моравскей прейґ 30 и сербскей националней меншини у Словацкей прейґ 28 000 еври.

Русини уж други рок доставаю векшу суму дзекуюци новому моделу розподзельованю средствох меншином, хтори компетентни державни орґани прилапели праве на предкладанє Русинох.

По тим моделу, векши процент средствох ше видвоює меншином хтори нє маю власну державу, а на суму уплївує нє лєм службене число припаднїкох єдней меншини, алє и службене число особох котри ше вияшнєли о мацеринским язику. То позитивно уплївовало на бужет за Русинох у Словацкей, понеже ше вецей як 20 000 особи вияшнєли же им русински мацерински, а нє уписали ше як припаднїки русинскей меншини – пишу Интернет новини Академиї русинскей култури Словацкей.

ПОВЯЗАНИ ТЕКСТИ