Русински камп и Скупштина Младих Русинох

автор лем.фм/зам
1.1k Опатрене

МАЛИ ЛИПНИК (СЛОВАЦКА) – У Малим Липнику у Словацкей, у старолюбовлянскей општини, вчера почал седми тродньови „Камп з младима по русински”, а на ютре там будзе отримана и Скупштина орґанизациї Млади Русини, хтора орґанизатор Кампу – пише портал лем.фм.

Од 9. по 11. септембер за младих Русинох зоз Словацкей у рамикох Кампу орґанизовани рижни роботнї и преподаваня з историї и сучасносци Русинох, як цо то о културним скарбу, о русинским язику, його початкох и будованю националней свидомосци, о Русинох и Церкви од єй початкох по нєшка, алє и о маркетинґу, односно реклами и брендованю, а будзе слова и о сотруднїцтве младих Русинох.

О спомнутих темох младим викладаю Петер Мацко, проф. др Йосиф Сипко з Прешовского универзитету, грекокатолїцки священїк о. Франтишек Крайняк, фаховец за маркетинґ Михал Пилип, та редактор „Радия фм” Петро Штефаняк.

Орґанизовани и спортски змаганя, школа русинского танцу, хтору водза члени Фолклорного ансамблу „Рутения”, учашнїки буду присуствовац и на богослуженьох, а на ютрейшей Скупштини орґанизациї Млади Русини будзе вибрана и нова Контролна рада на тророчни мандат. Пред роком вибране терашнє руководительство, на чолє з предсидательом Петром Яринчиком, так же їм мандат тирва ище 2 роки.

Орґанизация Млади Русини основана 2008. року, а по прешли рок на чолє єй бул Петро Штефаняк.

ПОВЯЗАНИ ТЕКСТИ