Рускей заєднїци барз значна потримовка Покраїнскей влади

автор фес
1.1k Опатрене

НОВИ САД – Делеґацию представительох руских институцийох, на чолє з предсидательом Националного совиту (НС) Руснацох Славком Рацом, вчера приял  предсидатель Покраїнскей влади         Иґор Мирович. У делеґациї були и директорка НВУ „Руске слово” Мартица Тамаш, о.д. директора Заводу за културу войводянских Руснацох Ивана Дудаш и о.д. директора Руского народного театру (РНТ) „Петро Ризнич Дядя” Таня Арва Планчак.

Найзначнєйши теми вчерайшей розгварки були проблеми пре зменшане проєктне финансованє шицких субєктох у рускей заєднїци. Нашо представителє упознали предсидателя Покраїнскей влади з найважнєйшима проблемами, алє и дальшима планами, наглашуюци же рускей заєднїци барз значне сотруднїцтво з Покраїнску владу и єй потримовка у рамикох рижних проєктох.

Предсидатель Мирович окреме виражел заинтересованосц за помоц у адаптованю просторийох НС за потреби шедзиска Заводу за културу войводянских Руснацох у Новим Садзе, бо би ше, як гварел, з тим ришело и просторни и финансийни проблеми НВУ „Руске слово”, пре плаценє драгей мешачней квартелїни.

1-NS-PV-02

Бешедоване и о помоци коло снованя „Рутен-радия” и доставаня нєкомерциялней фреквенциї, о помоци за снованє Фондациї „Музейна збирка Руснацох Войводини”, а од пана Мировича глєдана и потримовка же би и Општина Вербас финансовала роботу НС Руснацох. Предсидатель Мирович гварел же делеґация Покраїнске влади пошвидко одходзи до Вербасу, та ше завежнє за ришованє того проблему.

Предсидатель НС Славко Рац на стретнуцу з покраїнским премиєром бешедовал и о можлївосцох за школованє и змесценє школярох зоз Словацкей и України у нашей Ґимназиї у Руским Керестуре, визначуюци ище вше нє ришени проблем коло їх финансованя, а бешедоване и о способох за ришованє финансованя роботи РНТ „Петро Ризнич Дядя ”.

Кед слово о длугорочних планох, з предсидательом Мировичом бешедоване о потримовки Покраїнскей влади за вибудов Дому за школярох грекокатолїцкей церковней општини у Новим Садзе.

Войводянски премиєр Иґор Мирович вчера потвердзел же питанє очуваня идентитету и унапредзенє положеня националних меншинох у Войводини, та и рускей, приоритет у политики Покраїнскей влади и наглашел же, кед слово о финансийней потримовки  националним совитом меншинох у Войводини, будзе мац у оглядзе їх потреби у цалосци.

Тиж гварел же, у зависносци од средствох хтори буду на розполаганю после предстояцого ребалансу покраїнского буджету, уровень финансованя националних совитох будзе врацени на скорейши просек.

Предсидатель НС Славко Рац и члени нашей делеґациї з тей нагоди предсидателя Покраїнскей влади Иґора Мировича поволали на 55. Фестивал рускей култури „Червена ружа”, хтори будзе 1. и 2. октобра у Руским Керестуре.

1-NS-PV-03

ПОВЯЗАНИ ТЕКСТИ