КИЄВ – Концом 2014. року у Києве обявени порядни 14. и 15. том „Енциклопедиї Сучасней України”, у хторих, як и у предходних 13 томох, представени статї о рижних сферох живота и познатих дїячох у култури Руснацох и Українцох у Сербиї.
„Енциклопедия Сучасней України” (ЕСУ) вецейтомне енциклопедичне виданє о України у шицких обласцох од початку 20. столїтия до терашньосци и облапя шицки сфери живота, указуюци на материялни и общекултурни вредносци у України и дияспори. Заєднїцки є проєкт Институту енциклопедичних виглєдованьох Националней академиї наукох (НАН) України и Наукового товариства „Шевченко”.
Од початку твореня Енциклопедиї визначну улогу у составяню списку гаслох и писаню статьох о литератури Руснацох Сербиї мал член-кореспондент НАН України, др филолоґийних наукох Олекса Мишанич, а авторе статьох у Енциклопедиї Дюра Латяк, о. др Роман Миз, академик Микола Мушинка, Микола М. Цап, а од 13. тому и кандидат историйних наукох Наталия Стаценко.
У видрукованих 15 томох описани историйно-ґеоґрафски поняца (Бачка, Банат, Беоґрад, Войводина, Коцур), релиґийни живот (Крижевска епархия), а дати и велї мена познатих дїячох у литератури, релиґийним, културним и дружтвеним живоце Руснацох и Українцох у Сербиї.
Литература представена зоз статями о Мафтейови Винайови, Ирини Гарди Ковачевич, Штефанови Гудакови, Миронови Канюхови, Михайлови Ковачови, Владимирови Кирдови, Миронови Колошняйови, Осифови Костельникови, Владимирови Кочишови, Евґенийови Кочишови.
У ЕСУ представени статї-персоналиї о Гавриїлови Костельникови, владикови Дюрови Джуджарови, о. Дюрови Биндасови, о. Максимилиянови Буїлови, владикови Гавриїлови Букаткови, владикови Йоакимови Гербутови, о науковцох Стеванови Константиновичови, Миколови М. Кочишови, публицистох Миронови Жирошови и Владимирови Костелникови, о композиторови Иванови Ковачови, скулпторови Евґенови Кочишови, шпивачки Ирини Давосир Матанович, ґлумцох Драґенови Колєсарови и Ирени Колєсар, о дружтвених дїячох Дюрови Варґови, Федорови Колєсарови, спортскому дїячови Яшови Баковови.
ЕСУ ма и вельо илустрациї и фотоґрафиї, а онлайн-верзию ЕСУ, єй штернасти и петнасти том, мож видзиц на адреси htpp//esu.com.ua