ЗАҐРЕБ – Совит за национални меншини Републики Горватскей прешлого мешаца розпоредзел средства потримовки за програми витворйованя културней автономиї националних меншинох, за цо з державного буджету у тим року опредзелєни коло 4,7 милиони еври.
Союз Русинох Републики Горватскей, у чиїх рамикох дїйствує векшина наших културних дружтвох, информованє и видавательство, того року будзе розполагац зоз коло 90 000 еври, а вєдно, за Руснацох опредзелєни дацо вецей як спомнута сума.
За информованє по руски опредзелєни коло 27 000 еври, за видавательство коло 3,5 тисячи, Културней манифестациї „Петровски дзвон” коло 12 000, а за Науково-фахови сход „Руснаци вчера, нєшка ютре” у Осиєку 600 еври.
КУД „Яким Ґовля” з Миклошевцох и його културна манифестация достанє коло 12 000 еври, КУД „Яким Гарди” з Петровцох 8 500 еври, КУД „Осиф Костелник” з Вуковару и його манифестация „Перши аплауз” 9 000, КУД Руснацох Осиєк и його манифестациї 6 000, КУД Руснацох Винковци 3 200 еври, КУД Русинох и Українцох „Рушняк” з Риєки коло 3 000, Дружтво Руснацох и Українцох „Калїна” з Риєки коло 2 000, КПД Руснацох „Цвелферия” з Раєвого Села 1 500 еври, КУД „Рускиня и Руснак” зоз Заґребу коло 600 еври, а „Руснак” – Дружтво Руснацох у РГ з Петровцох коло 2 000 еври.
Опредзелєна сума пенєжу за руски КУД, манифестациї, фестивали, информованє и видавательство подобна як и прешлого року.