КОЦУР – Тих дньох коцурска грекокатолїцка церква Успения Пресвятей Богородици порушала сайт тей парохиї, а пред означованьом 250 рокох першей грекокатолїцкей церкви у Коцуре чия преслава будзе у авґусту.
На сайту ше находзи тродимензионални (3Д) знїмок церкви дзекуюци хторому мож опатриц нукашньосц церкви. За руску националну заєднїцу тот 3Д знїмок у сущносци историйни, бо є перши 3Д приказ єдней грекокатолїцкей церкви у Апостолским еґзархату за грекокатолїкох у Сербиї и медзи войводянскима Руснацами вообще. Тот диґитализовани приказ церкви реализовани у сотруднїцтве зоз новосадску „Информатику” хтора то нєсебично оможлївела.
Официйне представянє сайта ше планує за конєц шлїдуюцого тижня у форми уводней часци до заєднїцкей схадзки представительох Церковного одбора зоз шицкима нєвладовима орґанизациями Коцура, хтори жадаю помогнуц же би означованє ювилея було цо торжественше. Першу верзию сайта грекокатолїцкей церкви Успения Пресвятей Богородици у Коцуре мож опатриц на адреси: www.kocurskacerkva250.com