НОВИ САД – Предсидатель Лиґи социялдемократох Войводини (ЛСВ) Ненад Чанак виявел же Нови Сад инфраструктурно нє годзен витримац вше векши прилїв гражданох, понеже рочнє город достава коло 7 000 нових жительох, преноши 021 и здогадує же ше влонї до Войводини приселєли 28 105 гражданє, спомедзи котрих найвецей до Нового Саду.
Чанак гварел же други часци Войводини вше празнєйши, та нови хижи на валалє коштаю менєй як 10 000 еври.
– А нє сцу жиц у валалох пре централизацию хтора направена у Сербиї, и шицко цо нє на коридоре Будапешт-Нови Сад-Беоґрад-Ниш – препада. То нє случайно – гварел Чанак и додал же трецина Войводини и часци Нового Саду нє ма канализацию, а у двох трецинох Войводини пию нєисправну воду.
Прешлорочни податки Покраїнского секретарияту за защиту животного штредку указали же у велїх општинох векшина їх часцох нє ма канализацию, цо годно ришиц з додатнима средствами з Европскей униї.