СЕЧАНЬ – На вчерайшим першим дню Покраїнскей смотри рецитаторох у Сечню у катеґориї младшого возросту Ребека Семан з Руского Керестура виборела пласман на Републичну смотру, а медзи петнац найлєпшима у Войводини, котри достали Златни дипломи Смотри и Кристина Дюранїн з Дюрдьова. Попри спомнутих, по руски ше змагала и Катарина Недич з Коцура.
У конкуренциї младшого возросту (школяре од першей по штварту класу ОШ) на Покраїнскей смотри вчера участвовали 57-еро рецитаторе з писнями по сербски, мадярски, словацки, руски, горватски и ромски, спомедзи котрих шейсцчленови жири вибрал 15 найлєпших у Войводини, а вец з нїх и дзевецерих котри идуцого мешаца Войводину буду представяц на Републичней смотри у Валєвє. Медзи тима дзевецерима и Ребека Семан з Керестура.
Нєшка на Смотри будзе змаганє школярох висших класох ОШ, у катеґориї штреднього возросту, а по руски ше буду змагац Валентина Михняк и Валентина Салаґ з Дюрдьова, та Матей Шепински з Керестура.
Пре обовязки котри маю на соботу, кеди дзень за змаганє рецитаторох у катеґориї старшого возросту, жири вчера вислухал и два рецитаторки з того возросту по руски – Тимеу Будински и Леонтину Штефанко з Керестура, а їх евентуални пласман будзе познати на соботу.