НОВИ САД – Нєвладова орґанизация „Интеґрациї тераз” од 16. по 18. септембер у Готелу „Центер” у Новим Садзе орґанизовала едукацию за медиї з тему меншинского новинарства. На тродньовей едукациї преподавала професорка мултимедиялного новинарства з Арканзас Стейт универзитету у Зєдинєних Америцких Державох (ЗАД) др Лили Мей Фирс.
На едукациї участвовали дванац представителє медийох на меншинских язикох и медийох хтори пишу о меншинох, а попри представительох нашого „Руского слова”, були представителє словацких новинох „Глас люду”, мадярских „Мадяр со” и „Вайдашаґи мо”, румунских „Либертатеа”, „Горватскей риєчи”, РТВ Войводини и других медийох.
Учашнїки под час едукациї слухали о темох як цо то предрозсудки у медийох и стереотипизация, значносц розличносци у медийох, инклузивне новинарство, а по преподаваньох достали сертификати о законченим семинаре. Семинар привитал и аташе Амбасади ЗАД у Републики Сербиї Ерик Д. Хайден.