БЕОҐРАД – У Сербиї нєт достаточно добродзечних давательох орґанох – скоро 600 пациєнти чекаю трансплантацию покрутки, 65 особом потребна печинка, а пресадзованє шерца чекаю 60 пациєнти, гварене всоботу, 10. октобра, з нагоди означованя Европского дня давательох орґанох.
Директор Управи за биомедицину Ненад Милоїчич гварел же у Сербиї дотераз реґистровани 118 000 добродзечни давателє, а з таким числом наша держава медзи остатнїма по чишлє донорох.
– Сербиї потребни коло милион и пол подписани донорски карточки, же бизме могли повесц же цала нация упозната з процесом трансплантациї. Заєднїцка кампаня и указованє на значносц програми трансплантациї ключни за векше число донорох, та самим тим и за пресадзованє орґанох – гварел Милоїчич.
Кампаня хтора промовує даванє орґанох, з назву „Предлуж живот”, у Сербиї порушана 2009. року, а як потолковал Милоїчич, вона нєпреривно тирва.