ЕВРОПСКА КОМИСИЯ – На реаґованє горватскей посланїци у Европским парламенту Марияни Петир на гашенє Радио Суботици, хтори, як гварела, єдини у Сербиї каждодньово емитовал програму на горватским язику, европски комесар за преширенє Йоганес Хан одвитовал же Сербия муши обезпечиц функционованє медийох на меншинских язикох.
Хан поручел же Европска комисия провадзи стан у медийох на язикох националних меншинох и здогаднул же у остатнїм звиту о Сербиї Комисия наглашела потребу же би Радио-телевизия Сербиї обезпечела приступ информаийом на язикох националних меншинох, та условия за отримуюце функционованє локалних меншинских медийох и медийних програмох.
Власци у Сербиї маю обезпечиц финансийну потримовку медийом хтори емитую програми на язикох националних меншинох и так зачуваю емитованє програмох за национални меншини. Комесар Хан здогаднул же ше у идуцим кругу прегваркох будзе бешедовац о правох меншинох.