Сербия отворела перши два поглавя у прегваркох з ЕУ

автор танюґ/сен
1k Опатрене

БРИСЕЛ/БЕОҐРАД – На Другей медзивладовей конференциї, хтора отримана вчера вечар у Бриселу, Сербия отворела перши два поглавя и почина процес ускладзованя зоз стандардами и нормами Европскей униї. Сербия отвера поглавє 32, хторе ше занїма з финансийну контролу и поглавє 35, хторе ше занїма з одношеньом Беоґраду и Приштини.

Як преноша нашо медиї, премиєр Александар Вучич визначел же то значни дзень за Сербию, прето же европски интеґрациї указую на економске напредованє и файту дружтва якому сцеме припадац.

4-EU-02

Европски комесар за сушедство и политику преширеня Йоганес Ган повинчовал Сербиї, єй влади и гражданом на шицкому цо посцигнуте на европскей драги Сербиї, алє визначел же шлїдзи чежка робота.

– То держава хтора ма ясну европску перспективу, кед укладаце до Сербиї – укладаце до Европи и маце до нєй довирия. То ясни сиґнал гражданом же маю перспективу, же жем добра и дава нагоду младим же би остали – гварел Ган.

Премиєр Вучич ище скорей гварел же Сербия по 2019. рок жада закончиц шицку роботу коло европских интеґрацийох, а вец будзе на ЕУ най прилапи Сербию як члена.

Наявене же идуци поглавя Сербия можебуц отвори у першей половки 2016. року, а мали би то буц поглавя 23 и 24, хтори реґулую фундаментални права, а понеже су барз важни за ЕУ, вироятнє буду заварти аж на концу прегваркох.

ПОВЯЗАНИ ТЕКСТИ