СЕРБИЯ/НОВИ САД – З нагоди вчерайшого Медзинародного дня борби процив худобства, Канцелария Европскей мрежи процив худобства у Сербиї спозорела же ризику од худобства виложена штварцина жительства Сербиї, док трецина гражданох дума же чежко жиє, преноша нашо медиї.
Як наведзене, зоз стопу ризику од худобства од 25,4 одсто Сербия перша у Европи, прецо спомнута Европска мрежа поволала Владу Сербиї же би зменшанє худобства поставела як приоритет и же би швидко унапредзела политику обезпечованя роботи и социялней защити, пре зоперанє дальшого охудобньованя жительох.
Ризик од худобства найприсутнєйши у ґаздовствох у котрих жию два одроснути особи з троїма и вецей дзецми, дзе стопа ризику виноши 35,8 одсто, як и при самохраних родичох з єдним, лєбо вецей дзецми – 35,4 одсто.
Попри Сербиї, вельку стопу ризику од худобства маю и Румуния (22 одсто), Болгарска, Греческа и Шпания.
Податки о стопи ризику од худобства у Сербиї достати на основи виглєдованя Републичного заводу за статистику у марцу того року.
Статистика зазначела и же у Новим Садзе барз звекшане число гражданох котри доставаю социялну помоц. У 2015. року за даяку помоц до Центру за социялну роботу обрацели ше 38 549 гражданє и од 2011. по 2015. рок їх число звекшане за 31 одсто.