СУБОТИЦА – Сербия у ришованю меншинских питаньом може буц приклад другим державом и предводнїца у реґионє, поручели вчера министер за роботу, обезпечованє роботи, борецки и социялни питаня Александар Вулин и предсидатель Скупштини Войводини Иштван Пастор на отвераню 5. схадзки Медзивладовей мишаней комисиї Сербиї и Мадярскей о националних меншинох.
Вулин новинаром гварел же одношеня Сербиї и Мадярскей на историйним максимуму, же шицки отворени питаня остали за тима державами, и же Влада Сербиї пошвецена добросушедскей политики спрам шицких сушедох.
– Ришеня котри зме пренашли, насампредзе тоти о одношеню ґу меншинским заєднїцом на просторе Сербиї, вшелїяк же можу буц приклад другим державом. Ми горди на тото як ше одношиме ґу нашим меншином и наздаваме ше же ше и други жеми так буду справовац ґу сербскей меншини – наглашел Вулин, наглашуюци же би и єдна и друга жем були вельо худобнєйши кед би у нїх нє було Сербох, односно Мадярох.
Иштван Пастор гварел же помали постава допите виреченє же одношеня двох жемох нїґда нє були уровноваженши як нєшка, алє же то за ньго радосне виреченє, бо бенефитере такого стану, котри реални, сербска заєднїца у Мадярскей и мадярска заєднїца у Сербиї.