БЕОҐРАД – Пре нєвигодне положенє роботнїкох, роботу през викенд и нєдзелями, а насампредз пре плаци, хтори вельо менши од 44 000 динари, кельо штредня плаца у Сербиї, Самостойни синдикат вимага же би ше зоз законом реґуловало роботу внєдзелю.
– У векшини предавальньох ше практикує же роботнїки место векшей дньовнїци доставаю шєбодни дзень – гварели у синдикату, хтори предклада же би нєдзелями робели лєм специялизовани предавальнї. У Мадярскей така забрана уведзена влонї, алє постої одредба же мали фамелийни предавальнї, до 200 квадратни метери, можу робиц и внєдзелю.
У Европскей униї нєт окремни предписаня хтори реґулую роботу нєдзелями и на державни швета. Директива о роботним чаше, хтора принєшена 1993. року, утвердзела же минимални час за одпочивок ма уключиц и нєдзелю, медзитим, Европски суд правди ю о три роки понїщел.