ВЕРБАС – У Самостойним синдикату нєзадовольни з предкладаньом Општини Вербас, спрам хторого би нєвиплацени плаци занятим у локалним явним секторе мали буц виплацени по 30. юний 2016. року, сообщене на конференциї за медиї. Представителє Самостойного синдикату од чолнїкох Општини вимагаю же би ше по стреду идуцого тижня вияшнєли о новим синдикалним предкладаню – же би ше термин за виплацованє заостатих плацох орочело на пейц мешаци.
Кед таке предкладанє нє будзе прилапене, синдикални руководителє наявели радикализацию поступкох, пре витворйованя своїх правох.
Як визначене на конференциї, у явних подприємствох и установох у вербаскей општини пожнї найменєй єдна и пол плаца, а єст и подприємства дзе нє виплацени остатнї три плаци.
Заменїк предсидателя Општини Милан Ґлушац потвердзел же руководительство локалней самоуправи прияло вимогу Самостойного синдикату и виражел порихтаносц Општини за ришованє проблемох. Медзитим, додал же и заняти у явних подприємствох и установох муша буц свидоми чежкого финансийного стану у Општини, хтори нашлїдзени од скорейших власцох. Як гварел, понукнуце од 5 мешаци нє реалне, алє ше буду намагац найсц компромисне ришенє.
З тим у вязи, Општина Вербас руководительству Самостойного синдикату и синдикалних орґанизацийох явних подприємствох и установох вчера предложела же би ше основало заєднїцку роботну ґрупу за провадзенє и ришованє проблемох з виплацованьом заостатих заробкох.