НОВИ САД – Покраїнски посланїки на вчерайшей схадзки Скупштини АП Войводини прилапели заключеня з хторима ше предклада же би „Електровойводина” (ЕВ) затримало статус привредного дружтва, понеже у реструктуованю ЯП „Електропривреди Сербиї” (ЕПС) предвидзене злучованє ЕВ з „Електродистрибуцию Беоґрад”.
Покраїнски секретар за енерґетику Ненад Станкович Скупштину Войводини поинформовал о пошлїдкох гашеня ЕВ, оценює же єй гашенє чкодлїве за Покраїну и єй гражданох. Додал и же Покраїнска влада инсистує на реализациї шицких заключеньох за хтори о тим питаню гласали шицки посланїцки ґрупи ище 2012. року.
ЕВ би мала остац самостойна пре обезпечованє квалитетнєйшого и сиґурнєйшого випоручованя електричней енерґиї купцом, як и пре очуванє маєтку гражданох и привредних субєктох з териториї АПВ. Заключене и же би ше затримало децентрализовану систему за дистрибуцию и управянє з дистрибутивну систему, а за заключеня гласали посланїки Демократскей странки (ДС), Лиґи социялдемократох Войводини (ЛСВ) и Союзу войдводянских Мадярох (СВМ).
Ненад Борович з посланїцкей ґрупи демократох гварел же злучованє ЕВ до ЕПС представя однїманє маєтку АПВ, як и войводянскей привреди, хтора децениями укладала до ЕВ. Посланїк ЛСВ Роберт Колар сообщел же ЕВ дїлує з добитком, и тиж ше заложел за самостойни орґанизацийни статус ЕВ.
Предсидатель посланїцкей ґрупи напреднякох Предраґ Матеїн гварел же ше ДС з предкладаньом тей точки дньового шору „ясно отворела и указала же є автономашка странка”, и одруцел обтужби же слово о однїманю и окраданю маєтку.
Влада Сербиї зоз Заключеньом од 23. априла дала согласносц за початок поступку статусней пременки у рамикох ЕПС, з хтору предвидзене же ше и „Електровойводина” злучи до привредного дружтва „Електродистрибуция Беоґрад”.
Попри спомнутого, покраїнски посланїки розпатрали и звит о дїлованю Ґаранцийного фонду АП Войводини за прешли рок, звит о роботи Педаґоґийного заводу Войводини, як и звит о дїлованю и закончуюци рахунок Заводу за ровноправносц полох за прешли рок.