НОВИ САД – Спомедзи 13 точкох дньового шору на ютрейшей схадзки Скупштини АП Войводини будзе и розправа о ребалансу буджету Войводини. Пре нєдостаток пенєжу у покраїнскей каси, посланїки буду розпатрац Предлог покраїнскей скупштинскей одлуки по хторей би буджет за 2015. рок мал буц зменшани за 4,34 милиярди динари.
На дньовим шоре и Предлог о вименки Покраїнскей скупштинскей одлуки о снованю институту Биосенс, хтори би ше мал занїмац з виглєдованьом информацийно-комуникацийних технолоґийох и їх применьованьом у еколоґиї, защити животного штредку и польопривреди.
Надосц точки предвидзени о польопривреди, понеже пред посланїками Предлог о вименкох Покраїнскей скупштинскей одлуки о програми защити ушореня и хаснованя польопривредней жеми на териториї АПВ, Предлог о вименкох одлуки о програми унапредзеня статкарства у Войводини, як и Предлог о вименкох и дополнєньох одлуки о тогорочней програми мирох потримовки за запоровадзованє польопривредней политики за розвой валалох у АПВ.
Предлог покраїнскей скупштинскей одлуки о приношеню Акцийного плану политики за младих у АП Войводини за период од 2015. по 2020. рок тиж будзе на дньовим шоре зашеданя Скупштини, як и менованє предсидателя, членох и секретара Покраїнскей виберанковей комисиї и їх заменїкох.