РУСКИ КЕРЕСТУР – Дотерашня предсидателька Здруженя женох „Байка” з Руского Керестура Славица Катона вибрана за предсидательку на нови штиророчни мандат – одлучели членїци Здруженя на вчерайшей пиятей порядней Рочней скупштини. И заменїца предсидательки Ксения Йованович знова вибрана на тоту длужносц.
Як презентоване у звитох о роботи и финансийох, Здруженє и у прешлим року було активне, средства достало на трох покраїнских конкурсох – як соорґанизатор месних манифестацийох и за свойо власни проєкти на чуваню старих ремеслох, а витворени и позитивни финансийни биланс.
За „Байку” барз важне представяц руску културу и традицию, а поготов руски стародавни єдла, цо и витворює на манифестацийох у Керестуре и ширше, дзе тиж презентує и ручни виробки своїх членїцох. Ґу тому, у „Байки” досц поробене и на твореню автентичних сувенирох Руского Керестура.
Подобни активносци Здруженє женох „Байка” планує и у 2016. року, а на Скупштини прилапене предкладанє же би ше з проєктами конкуровало и на конкурси других уровньох власци, а нє лєм до покраїнских секретариятох, як було дотераз.
На Скупштини присуствовали и представителє дзепоєдних других валалских здруженьох, секретар Месней заєднїци Михайло Сабадош и предсидатель Вивершного одбору Националного совиту Руснацох Желько Ковач.
