СНС на власци у шицких войводянских општинох

автор днв/сен
1.4k Опатрене

ВОЙВОДИНА – После позарядових виберанкох у априлу и поствиберанкових догваркох, Сербска напредна странка (СНС) ше находзи у локалней власци у шицких 45 општинох у Войводини. Таки резултат ище нє зазначени од уводзеня вецейстранковей системи власци, пише „Дневник“.

У 41 локалней самоуправи предсидателє городох и општинох зоз СНС. У штирох општинох – Сенти, Ади, Канїжи и Бачкей Тополї нє маю предсидательох, алє предсидательох локалних скупштинох, гварел подпредсидатель Вивершного одбору СНС Дамир Зобеница, котри задлужени за Войводину.

Абсолутна власц зоз собу ноши и вельку одвичательносц, та наявене периодичне анализованє роботи кадрох у локалних самоуправох.

Гоч Лиґа социялдемократох Войводини (ЛСВ) у покраїнскей и републичней власци опозиция, СНС витворела коалицию з тоту странку на локалним уровню. Напредняки сотрудзую и з гласнима политичнима процивнїками на републичним и покраїнским уровню – Сербску радикалну странку (СРС) и Демократску странку Сербиї (ДСС).

На виберанкох СНС добри резултати посцигла и у општинох дзе векшинске жительство припаднїки националних меншинох, та праве зоз странками националних меншинох витворела коалициї. Спомедзи нїх наймоцнєйша зоз Союзом войводянских Мадярох.

Окрем спомнутих, владаюца странка на локалним уровню сотрудзує и зоз Социялистичну партию Сербиї (СПС) и Єдинствену Сербию (ЄС).

ПОВЯЗАНИ ТЕКСТИ