НОВИ САД – Предсидателька Парламентарней скупштини Совиту Европи (ПС СЕ) Ан Брасер вчера нащивела Скупштину АП Войводини, а у рамикох розгваркох о стану у обласци витворйованя людских и меншинских правох, стретла ше з представителями националних совитох меншинских заєднїцох хтори жию у Сербиї.
Спред Националного совиту Руснацох (НС) на сходзе бул заменїк предсидателя Совиту Йовґен Мудри, котри у викладаню у хторим представел войводянских Руснацох визначел же руска заєднїца державу доживює як партнера од хторого обчекує амбиєнт у хторим ше, без препреченьох, можу витворйовац здобути права.
Заєднїцке становиско националних совитох же у АП Войводини процес интеґрованя меншинских заєднїцох до шицких сеґментох дружтва на добрей драги, а успишни и намаганя же би ше очувало идентитет, културу и традицию. Медзитим, же би тоти процеси були лєпши, окрем очуваня уровню здобутих правох потребне злєпшац законски рамик и механїзми финансованя.
После сходу з представителями националних совитох, предсидателька ПС СЕ Ан Брасер окреме визначела же импресивна витирвалосц з хтору совити приступаю ґу проблематики меншинских правох, як и високи ступень медзисобного сотруднїцтва розличних заєднїцох у тей обласци. По єй словох, Совит Европи вше порихтани помогнуц коло ришованя проблемох у сполньованю меншинских правох.
Окрем о меншинских правох, предсидателька ПС СЕ Ан Брасер з подпредсидательку Скупштини Войводини Ану Томанову Маканову бешедовала и о положеню Покраїни у уставно-правним рамику Републики Сербиї, а з тей нагоди заєднїцки заключене же автономия муши мац свойо компетенциї и финансиї же би ше могла витвориц. У тим контексту, спозорене же законодавни процеси у тей обласци муша буц пошвидшани.