Сотрудзовац з Поверенїком пре зоперанє дискриминациї меншинох

автор сам/зам
844 Опатрене

БЕОҐРАД – Нова Поверителька за защиту ровноправносци Бранкица Янкович з представителями националних совитох националних меншинох вчера, 15.септембра, у старим будинку Народней скупштини у Беоґрадзе отримала округли стол, перши як є вибрана на тоту функцию, з тему „Улога националних совитох националних меншинох у борби процив дискриминациї”. Национални совит Руснацох на округлим столє представял заменїк предсидателя Совиту Йовґен Мудри.

Представителє националних совитох Поверительки винєсли проблеми з якима ше зочую, винєсли свойо искуства у борби процив дискриминациї, як и проблеми у дискриминациї у обласци образованя, дзе наглашене же маю почежкосци з учебнїками и виучованьом мацеринского язика.

Поверителька Бранкица Янкович гварела же прешлого року найвецей притужби – 142 – дати пре дискриминацию на националней основи, углавним при обезпечованю роботи, алє и пре нєдостаток учебнїкох и нєвиучованє язика. Поволала представительох националних совитох же би и надалєй сотрудзовали з Канцеларию Поверенїка за защиту ровноправносци, подношели притужби, бо на тот способ можу уплївовац на унапредзенє своїх правох.

2-Poverenjik-02

Йовґен Мудри з тей нагоди за Радио Нови Сад визначел же би держава мала направиц одвитуюцу климу же би припаднїки националних меншинох могли хасновац свойо права котри им держава дала, без страху же буду дискриминовани прето же припадаю даєдному меншинскому народу.

З присутнима на тему дискриминациї у образованю бешедовали и Мая Стоянович з Гражданских инициятивох и Драґан Попович з Хижи людских правох и демократиї.

Директорка Гражданских инициятивох визначела же дискриминацию мож замерковац при школярох, у учебнїкох и при младих котри указую нїзки ступень толеранциї, понеже образовна система у Сербиї уж длуго нє креирує отворену и толерантну климу, а то нєобходне за инклузию и почитованє розличносцох.

Округли стол отримани у рамикох проєкту „Най ровноправносц постанє стварносц” Поверителя за защиту ровноправносци и Хижи людских правох и демократиї.

ПОВЯЗАНИ ТЕКСТИ