КУЛА – Розпатранє и прилапйованє Одлуки о буджету Општини Кула за 2016. рок будзе главна точка нєшкайшей схадзки Скупштини општини Кула (на 10 г.), а пред одборнїками и даванє согласносцох на програми дїлованя у идуцим року за вецей явно-комунални подприємства, медзи нїма и за керестурске ЯКП „Руском”.
Одборнїки буду розпатрац и вименки Одлуки о Општинскей управи, Нарис одлуки о плацох вибраних, менованих и поставених особох и за занятих у Општинскей управи, Предлог одлуки о надополнєню за защиту и унапредзенє животного штредку, як и о приношеню просторного плану општини Кула.
Нєшка би мала буц принєшена и одлука о наградзованю спортистох и спортских клубох, а на дньовим шоре и кадрово питаня, понеже наявене розришенє и менованє школских одборох, членох управних и надпатраюцих одборох, як и менованє окончовательох длужносци директора у установох хторим Општина снователь.