Сполнєти обчекованя орґанизаторох

автор зам; фото:фейсбук
1.3k Опатрене

СВИДНЇК (СЛОВАЦКА) – Штварти Фестивал русинскей култури, хтори од 23. по 29. май отримани у Свиднїку, у Словацкей, у цалосци сполнєл обчекованя орґанизаторох – гварел Милош Стрончек з Окружного одбору Русинскей оброди Свиднїк, хтора, вєдно з местом Свиднїк була нєпоштредни орґанизатор популарно воланого Русинского фестивалу.

Портал „русинФОРУМ” преноши текст новинох „Корзар”, у хторим Стрончек визначел же лєм на музично-фолклорних програмох, хтори на Фестивалє отримани од 27. по 29. май, було прейґ тисяч учашнїкох, а попри зоз Словацкей, на Фестивалє того року наступали Русини з Польскей и зоз Сербиї, з Вербасу.

1-Festival-02

На програмох Фестивалу у цалим тижню отримани вистави русинских авторох, проєкциї филмох о Русинох, вецей тематски викладаня и розправи, аматерски и професийни представи, у його рамикох перши раз отримани и Фестивал вири, а як наглашел Стрончек – пестованє и подзвигованє русинскей свидомосци єден з главних цильох Фестивалу.

Ґу тому, як гварел, Фестивал ма и значни образовни характер, бо на нїм участвовали,  бешедовали и по русински шпивали и дзеци, як и ансамбли старших, як цо то „Волянка”, шпивацка ґрупа „Роса” з Прешова, „Виходнярски шарканьки”, „Маковица” зоз Свиднїку, професийни ансамбл ПУНА з Прешова.

Окремни госци були и оперни шпивач з русинскима коренями Иґор Куцер, та шпивачка Кристина зоз Свиднїку и Мариан Чековски, котри на бини бешедовали по русински, а шпивали и русински шпиванки.

– Од учашнїкох вимагаме же би на сцени бешедовали по русински, бо то ма вельки уплїв, окреме на дзеци – гварел Стрончек, котри визначел же лєм на нєдзельових програмох у свиднїцким амфитеатре було вецей як 5 000 патрачох.

1-Festival-03

ПОВЯЗАНИ ТЕКСТИ