НОВИ САД – Покраїнска влада и Национална алиянса за локални економски розвой – НАЛЕД вчера подписали Спорозуменє о сотруднїцтве на твореню вигоднєйшого амбиєнту за дїлованє и инвестованє у Войводини.
Спорозуменє подписали покраїнски премиєр Иґор Мирович и предсидатель Управного одбору НАЛЕД-у Ґоран Ковачевич, у присустве министерки державней управи и локалней самоуправи Ани Брнабич.
Спорозуменє подписане пре моцнєнє економских капацитетох городох и општинох и творенє можлївосцох за реализацию укладаньох прейґ явно-приватних партнерствох.
– Спорозуменє о сотруднїцтве за нас велька шанса, бо општини котри сотрудзовали з НАЛЕД-ом мали конкретни хасен у поєдноставйованю административних процедурох и швидшим економским розвою – гварел предсидатель Покраїнскей влади Иґор Мирович.
Предсидатель Управного одбору НАЛЕД-у Ґоран Ковачевич визначел же кредибилни амбиєнт за дїлованє привреди и ефикасну админитрацию войводянски општини можу здобуц з преходом през програму сертификованя општинох з вигодним дїловним окруженьом у юговосточней Европи, хтора дава ясни напрямки як можу постац ефикасни сервис за привреду и инвеститорох.
Министерка державней управи и локалней самоуправи Ана Брнабич виражела наздаванє же Спорозуменє принєше велї конкретни резултати у розвою городох и општинох, цо и приоритет Влади Сербиї.
Покраїнска влада и НАЛЕД буду провадзиц и унапрямовац запровадзованє стратеґийних и розвойних планох войводянских општинох, потримаю формованє и моцнєнє капацитетох општинских канцеларийох за локални економски розвой, запровадза специялизовани обуки за усовершованє службенїкох на локалу, допринєшу уводзеню е-управи и єдношалтерскей системи през поєдноставйованє процедурох и буду промововац инвестицийни потенцияли и конкурентски предносци городох и општинох у Войводини.