РУСКИ КЕРЕСТУР – Спортска гала од нєшка придата на управянє рускокерестурскей Месней заєднїци, а то окончене у Кабинету предсидателя Општини Кула дзе контракт о тим подписали предсидатель Совиту МЗ Владимир Олеяр, предсидатель Општини Дамян Милянич и у мено Покраїнскей влади Зорица Лазич.
Як за Рутенпрес виявел Олеяр, з тим конєчно положена точка на длугорочни проблем коло отримованя и зогриваня Гали пре нєрозришени маєтно-правни одношеня медзи Општину и Покраїну.
Отримованє и зогриванє Гали од того року зоз буджетну обовязку ма Општина Кула хтора уж опредзелєла 3,5 милиони динари за шицки потреби коло гали. По Олеярових словох, з тим пенєжом будзе ше плациц зогриванє, одн. ґаз, найвироятнєйше аж од єшенї понеже уж приходзи цепла хвиля, струя и други комунални потреби за цо опредзелєни коло 2 милиони, док за роботу домара и пораячку коло милион динари.
Приблїжно 300 тисячи з опредзелєного буджету за галу, того року пойду за Комисию инжинєрох хтора ма буц оформена и хтора ма випитац ґасни инсталациї и 200 тисячи же би ше технїчно пущело зогриванє.
