РУСКИ КЕРЕСТУР – На вчерайшей схадзки Совиту Месней заєднїци (МЗ) Руски Керестур винєшена и информация о отримованю и стараню о Спортскей гали, дзе каждодньово єст рижни спортски активносци, и заключене же ше Галу добре отримує.
Особа задлужена за Галу и єй хаснованє барз добре роби тоту роботу, гварене на схадзки Совиту, каждодньово є присутна у Гали, простор попораєни и отримовани. Члени Совиту МЗ визначели же су задовольни з єй роботу, та за тото и надалєй ма полну потримовку як од Совиту, так и од Керестурцох.
Винєшене же за 15 мешаци, кельо Спортска гала роби, видати 130 квити за єй хаснованє, на основи чого приходовани коло 350 000 динари, цо коло 22 000 динари мешачно, так же, як поведзене, нєт основи за дзепоєдни злонамирни пригварки же ше з Галу нєдобре ґаздує. З того пенєжу ше троши и за потребни менши оправки, а 20 000 мешачно идзе на пораєнє.
Тиж поведзене же зоз своїма услугами за Галу вше на помоци подприємство „Електромонтажа”, ЯКП „Руском”, Месна заєднїца, Школа „Петро Кузмяк” и други.