НОВИ САД – Урядову предвиберанкову кампаню Социялистична партия Сербиї (СПС) почала вчера з митинґом на новосадским СПЕНС-у, на хторей єй предсидатель Ивица Дачич представел идеї тей странки и поволал гражданох же би 24. априла гласали за коалицию СПС-Єдинствена Сербия.
– Наша коалиция єдини ґарант же у Войводини преовладаю моци хтори ше закладаю за єдинствену Сербию. Войводина Сербска автономия, вона автономия у Сербиї, а нє процив Сербиї и вше така будзе – гварел Дачич.
Вон визначел же ше будзе закладац най Сербия будзе держава социялней правди, та же найлєпше препорука за СПС и Єдинствену Сербию то праве їх робота на терену. На митинґу бешедовали и предсидатель Покраїнского одбору СПС Душан Баятович и предсидатель Єдинственей Сербиї Драґан Маркович Палма.
Поволуюци присутних най гласаю за тоту коалицию, Дачич гварел же ше „жем бранї нє лєм з оружийом, алє и зоз шерцом и пирком, односно з клайбасом на виберанкох”.