ШИД – На други повторени конкурс Општини Шид за софинансованє проєктох у обласци явного информованя за електронски медиї, хтори бул розписани концом авґуста, сцигли три проєкти, а Фахова комисия, хтору формовал предсидатель Општини Никола Васич, вибрала два за софинансованє, док єден проєкт одбити.
Општина Шид з 200 000 динари будзе софинансовац проєкт з меном „Информуй ше – Шид”, хтори реализує Драґана Тешич, ПР Авдио и видео продукция „Сирмиюм продукция” зоз Шиду, а зоз 100 000 динари проєкт „Унапредзованє публицитету активносцох орґанох општини Шид як доприношенє унапредзованю информованя гражданох општини, покраїни и републики” Новинскей аґенциї „Бета пресс” з Беоґраду.
У першим проєкту „Сирмиюм продукция” до конца того рока планує емитовац 61 ТВ форму з рижних обласцох з хторима, як оценєла Фахова комисия, будзе витворени явни интерес Општини Шид у обласци явного информованя.
Други проєкт Аґенциї „Бета” понука континуоване пласованє информацийох зоз шидскей општини прейґ цалосней мрежи спомнутей аґенциї широкей ґрупи хасновательох.
По одлуки Комисиї, средства нє додзелєни проєкту „Погляднїци зоз Шиду” хтори придала „Коперникус кабловска мрежа” з Нишу пре, як обгрунтоване, емитованє вельо меншого числа ТВ форматох у одношеню на други проєкти хтори сцигли на конкурс.
Предлоги Фаховей комисиї прилапел предсидатель Општини Шид Никола Васич и принєсол горе наведзени ришеня о опредзельованю средствох по конкурсу.