РУСКИ КЕРЕСТУР – За дотациї з прилїву до тогорочного самодоприносу на наменски конкурси хтори пошвидко розпише Општина Кула годни конкуровац лєм Здруженя гражданох (ЗГ) хторим шедзиско у Руским Керестуре, поведзене на остатнєй схадзки Совиту Месней заєднїци (МЗ) Руски Керестур, стреду, 8. априла.
За пенєж опредзелєни за спорт годни конкуровац клуби Спортского дружтва (СД) „Русин”, алє поєдинєчно, нє як СД. У тим и Конїцки клуб „Русин” и Здруженє спортских рибарох „Коляк”, хторим опредзелєни по 35 000 динари.
Спрам на Совиту МЗ опредзелєних средствох, на будуци наменски конкурс Општини Здруженє женох „Байка” може конкуровац за 60 000 динари, а за по 35 000 ЗГ „Аґробизнис инкубатор” (Интернет-радио Руски Керестур); „Пакт Рутенорум”, Туристичне здруженє „Руски Керестур” и Здруженє ремеселнїкох и приватних поднїмательох.
Надалєй, Здруженє паприґарох годно конкуровац за 45 000 динари, Добродзечне огньогасне дружтво за 60 000, ЗГ „Желєни персцень” за 20 000, Здруженє пензионерох за 35 000, СБ „Яша Баков” за 20 000, а за по 10 000 динари Руска матка, Здруженє Ромох „Лоли лулидї”, Мото-клуб „Шаркань”, як и Мото-клуб MC FIRES, кед же урядово будзе реґистровани по розписованє конкурсу. Конкуровац годно и за порядну дїялносц.
Спомнути здруженя гражданох за медийску и туристичну презентацию места, та за дотациї и помоц здруженьом гражданох у 2015. року зоз самодоприносу вєдно достаню 2 милиони 100 000 динари.