НОВИ САД – Же би ше злєпшало стан у привреди у Сербиї, потребне запровадзиц реформу финансийней системи, укладац до продукциї, та принєсц нови закони – заключене на конференциї о стану привреди у Сербиї, хтора пияток, 13. новембра, отримана у Скупштини Войводини у орґанизациї Покраїнско-економского совиту.
Представителє синдикатох гварели же єден з найвекших проблемох з хторима ше зочую гражданє то велька нєзанятосц, цо пошлїдок нєвиєдначеней приватизациї у Войводини.
Предсидатель Привредней комори Войводини Ратко Филипович на конференциї гварел же после прешлого року чежко оценїц точни стан у нашей привреди. Привреднїки були конкретнєйши, та оценєли же стан у привреди у Сербиї исти як пред 15 роками, насампредз прето же нє подзвигнити уровень продукциї.
Нагода за розвой би могла буц продукция орґанскей поживи, у чим би Сербия могла буц лидер, оценєте на конференциї.