РУСКИ КЕРЕСТУР – Стретнуце волонтерох Националного Каритасу Сербиї будзе 1. юния, на соботу у Руским Керестуре у нашей Водици. О подробносцох Стретнуца порадзене вчера на схадзки у парохийним Каритасу на хторей були присутни найвисши представителє Националного Каритасу на чолє з директором влч. Ивицом Дамяновичом, нашого владического, парохийних каритасох з Коцура и Керестура и їх парохове.
Стретнуце волонтерох Националного Каритасу Сербиї то рочни сход волонтерох зоз штирох римокатолїцких и нашого владичества св. Миколая, а циль стретнуца же би ше волонтере духовно вєдно преглїбели и раз рочно ше видзели и дожили же су єдна Церква, два обряди, даскельо язики – виявел за Рутенпрес директор Каритасу нашей епархиї о. Владислав Варґа котри и водзел схадзку.
Вон визначел же на Стретнуце поволани шицки, и волонтере зоз шицких наших парохийох, а трошки як цо полудзенок и приход, будзе финансовац Национални Каритас.
Стретнуце почнє на 11 годзин зоз Службу Божу у нашим обрядзе хтору будзе предводзиц наш владика Георгий, а о теми Парохия и Каритас будзе наказовац беоґрадски надвладика монс.Станислав Хочевар. Потим будзе робота у менших ґрупох и пленарне стретнуце.
Того дня будзе означена и 25-рочнїца нашого Каритасу, а госцох ше упозна и з историятом Водици, хтору вчера нащивели и учашнїци схадзки пошвеценей тому Стретнуцу.
